Coma o precisa Joan-Pau Becvort, director de l’Institut d’estudis occitans de Garona-Nauta, « lo festenal Occitania a una vision universalista de la cultura occitana. Botam pas en plaça una programacion per tala o tala part de la populacion, avem la volontat de nos adreçar a tota la societat ». Atal, totas las fòrmas artisticas, del teatre a la musica, en tot passant per l’art contemporanèu an, aicí, dreit de citat per balhar l’enveja de veire e de descobrir la diversitat de creacion. « Nòstre festenal es mutualista, perseguís Joan-Pau Becvort, se debana sus un vintenat de comunas de Garona-Nauta – a Tolosa, Venèrca, Caseras, Murèth, Bossens, Sent Lis, Vilafranca de Lauragués…- mes tanben present dins Tarn e Hautas-Pireneus. La programacion es botada en plaça, cada an, ambe l’ajuda de 80 partenaris del territòri. » E l’an passat, foguèron 88 artistas que venguèron sus las planchas del festenal. Per l’edicion 2018, l’eclectisme es la règla, ambe teatre, musicas de l’ora d’ara e tradicionalas - l’infatigable grop Nadau que serà de la partida - musica classica, eveniments de carrièra e un espectacle concèrt sons e luses, prepausat pel grop OC a Murèth per evocar la crosada contra los Albigeses.