« Las lengas e culturas regionalas apertenon al patrimòni de la França, lor ensenhament es favorizat prioritariament dins las regions ont son en usatge ». En Nauta-Garona, aquel estrach del còdi de l’Educacion pren tota la sieuna mesura dempuèi que lo ministre de l’Educacion Nacionala lancèt la refòrma dels licèus e del bachelierat, que prevei notadament la supression de la causida de l’occitan en tresena lenga viva.
Una revision de la refòrma
Plan engatjat per la defensa e la promocion de la lenga e de la cultura occitanas, lo Conselh departamental demandèt une revision d’aquela « refòrma Blanquer » qui poiriá, si demorava atal, descoratjar los escolars de començar o de perseguir estudis en occitan. Un vòt foguèt adoptat, a l’unanimitat de l’assemblada departamentala, en genièr darrièr, per demandar una tièra d’amandaments coma la simplificacion de las causidas de las opcions al licèu, o, tanben, la paritat de tractament entre las lengas de l’antiquitat e las lengas regionalas. Dins un corrièr mandat al primièr ministre Edouard Philippe, lo President del Conselh departamental tornèt dire qu’aquelas mesuras de la refòrma son en contradiccion ambe la Constitucion. « Las lengas regionalas son una vertadièra riquessa culturala e patrimoniala inestimable per los territòris e per la França, aquò diu pas èsser mesconegut pel Governament » indiquèt Jòrdi Meric.
